ಬಂದಿತು ನೋಡೊ ಪಾತರಗಿತ್ತಿ

ಬಂದಿತು ನೋಡೊ ಪಾತರಗಿತ್ತಿ

ಹಾಡುತ ಕುಣಿಯುತ ಊರನು ಸುತ್ತಿ

ಎಷ್ಟೇ ಅಲೆದರು ಬಣ್ಣವು ಮಾಸದೆ

ಬಿಸಿಲಿನ ಬೇಗೆಗೆ ಸ್ವಲ್ಪವು ದಣಿಯದೆ

ಬಂದಿತು ನೋಡೊ ಪಾತರಗಿತ್ತಿ

ಕಣ್ಣಿಗೆ ಕಂಡರು, ಕೈಯಿಗೆ ಸಿಗದೆ

ಒಂದು ಕ್ಷಣವು ಎಲ್ಲಿಯು ನಿಲ್ಲದೆ

ಹೂವಿಂದ ಹೂವಿಗೆ ಹಾರುತ

ಕುಸುಮಗಳ ಮಕರಂದ ಹೀರುತ

ಹಾರಿತು ನೋಡೊ ಪಾತರಗಿತ್ತಿ

ದೇಹವು ಚಿಕ್ಕದು ಬಣ್ಣದ ಚಿಟ್ಟೆಗೆ

ಅದರ ರಮ್ಯತೆ ನಿಲುಕದು ಮಾತಿಗೆ

ಬದುಕುವ ಅವಧಿ ಅಲ್ಪವೆಯಾದರು

ಜೀವನ ರೀತಿ ಸುಟಾತ್ಮಕವು..

- ಅ. ರಾ. ತೇ

(ಸುಮಾರು ಆರು-ಏಳು ವರುಷಗಳ ಹಿಂದೆ ಬರೆದ್ದದ್ದು)

ನಿನಗೆ ನಾನೇ ಒಂದು ಪದ್ಯವಾದೆ

ಕಂಡೆನೊಂದು ಸಿಂಚನ

ಹೊಸ ರೀತಿಯಾಗಿ

ನನ್ನ ಕರದಿ ಬಂಧಿಯಾದ

ನಿನ್ನ ಮೊಗದ

ಅರಳಿದ ತುಟಿಗಳಲ್ಲಿ.. 

ರಮಿಸುವೆ ಅನುಕ್ಷಣ 

ನಿನ್ನ ನಗುವೆಲ್ಲವ ಆರಿಸಿ

ಹೃದಯದ ಬುತ್ತಿ ತುಂಬಿಕೊಳ್ಳುವಾಗ

ನಿನ್ನ ಚೆಲುವ ಕಾಣುವಾಗ

ಆಗಸದೆತ್ತರಕೆ ಚಿಮ್ಮುವೆ ನಾ 

ಕಾಮನಬಿಲ್ಲ ರಂಗಲಿ 

ಹೊಸೆದ ಸಾಲಿ 

ಉಟ್ಟ ನೀನು

ಮೋಹಿತನಾದ ನಾನು..!!

ಬಣ್ಣಿಸಲಿ ಇನ್ನು ಹೇಗೆ 

ಮೂಕವಿಸ್ಮಿತನಾಗಿಸಿ ನನ್ನ 

ನಾಚುತ್ತಾ ನೀ ಕೂತಾಗ 

ಪ್ರತಿ ಪುಸ್ತಕದ ಹಾಳೆಯ ನಡುವೆ

ನಿನ್ನ ಮೇಲೆಯೆ ಕವಿತೆಗಳು 

ಶಾಹಿ ಖಾಲಿ ಆಯಿತೆ ಹೊರತು

ನನ್ನ ಪ್ರೇಮವಲ್ಲ!! 

ನಿನಗೆ ನಾನೇ ಒಂದು ಪದ್ಯವಾದೆ - 

ಚೆಲುವ ಕನ್ನಿಕೆ.. 

- ಅ. ರಾ. ತೇಜಸ್ 

ಪ್ರತಿ ಹೆಜ್ಜೆಯ ಸಂಭ್ರಮ

ಚೆಲ್ಲ ಪಿಲ್ಲಿಯ ಬದುಕು 
ಹುಟ್ಟು ಒಂದೆಡೆ 
ಸಾವು ಮತ್ತೊಂದೆಡೆ 
ಜೀವಿಸುವ ಪ್ರತಿ ಕ್ಷಣವು
ಅನಿಶ್ಚಿತ, ಅನಿರೀಕ್ಷಿತ...

ದೂರದ ಎರಡು ಮನಸು 
ಪ್ರೇಮಾಂಕುರದಿ ಬಂಧಿಯಾಗುವುದು
ಮತ್ತೊಂದು ಸೊಗಸು 
ಕನಸುಗಳು ಭಿನ್ನ 
ಆಸೆಗಳು ವಿಭಿನ್ನ 
ಆದರೂ ಕೂಡುವುದು  ಒಂದಾಗಿ
ಕುಟುಂಬವೆಂಬ ಆಸರೆಯ ಹೆಸರಾಗಿ.. 

ಎಲ್ಲರದು ಒಂಟಿ ಪಯಣ 
ಆದರೂ ಜೊತೆಯಲ್ಲೇ 
ನಾನು ನನ್ನದು, ತಾನು ತನ್ನದು.
ಎಲ್ಲವೂ ಮಿಶ್ರಣ 
ಬೆಸದ ಮನಗಳ ಪ್ರತಿ ಹೆಜ್ಜೆಯ ಸಂಭ್ರಮ..

- ಅ.ರಾ.ತೇಜಸ್
(ಪುರವಣಿಯ ಚಿತ್ರ ಕಾವ್ಯಕ್ಕೆ ಬರೆದದ್ದು)

ನಿನ್ನ ಮುಂಗುರುಳು ಸರಿದು

ನಿನ್ನ ಮುಂಗುರುಳು ಸರಿದು
ನಿನ್ನ ಕಣ್ಣ ಮುತ್ತುವಾಗ
ನನ್ನ ಅಸೂಯೆ ದುಪ್ಪಟ್ಟು ಆಗುತ್ತದೆ
ಆ ತುಟಿಗಳ ನಡುವೆ
ಕಳ್ಳನಂತೆ ಸುಳಿವ ಆ ಕಿರುನಗೆ
ಬರೀ ನನ್ನವೇ ಆಗಿರುವಾಸೆ..

ನಿನ್ನ ಎದೆಬಡಿತಕೆ
ಸರಿಸಾಟಿಯಾದ ಸಂಗೀತ ಉಂಟೇ
ಶೃತಿ ಹಿಡಿದು ಬಡಿವ ಅದು
ನನ್ನ ಹೊತ್ತುಕೊಂಡೆ ಕುಣಿವುದು!!

ನಾ ಕಳುಹಿಸುತ್ತಿರುವ ಅಂಚೆ
ನಿನಗೆ ತಲುಪುತ್ತಿದ್ದೆಯೇ ಸರಿಯಾಗಿ?
ನಿನ್ನ ನೆನೆವ ಪ್ರತಿ ಸಲ ಬರೆಯುವೆ
ಹೊರಲಾಗದೆ ಕುಸಿದಿರಬೇಕು
ಪಾಪ ಆ ಅಂಚೆ ತಲುಪಿಸುವವ..

ಆತ್ಮವಿಶ್ವಾಸಕೆ ಅರ್ಥ ನಿನ್ನ ಮಾತು
ಅನುರಾಗದ ಕನ್ನಡಿ ನಿನ್ನ ಕಣ್ಣು
ಅಮರತ್ವಕೆ ಶೀರ್ಷಿಕೆ ನಮ್ಮ ಪ್ರೀತಿ
ದಿಗಂತದ ಸೂಚಿ ನಿನ್ನ ನೆನಪು..

- ಅ. ರಾ. ತೇಜಸ್