ಹನಿಗಳು

ಕಂಗಳಲಿ ಮೊಳೆತ
ಪ್ರೀತಿಗೆ
ಕಣ್ಣ ಹನಿಗಳೆ
ಆಸರೆ
----------------
ತುಟಿಯ ಅಂಚಿನ
ತುಡಿತ
ಮುತ್ತಿನ ಹನಿಗಳಲಿ
ಬೆರೆತಿತು 
----------------
ಕನಸು ಕಾಣುವ
ರೀತಿಗೆ
ಅವಳ ಹೆಸರೆ
ಶೀರ್ಷಿಕೆ
----------------
ಮನಸ್ಸಿನ ದುರ್ಗಮ
ದಾರಿಯನೆಲ್ಲ
ಅವಳ ಪ್ರೀತಿಯು
ಸುಗಮವಾಗಿಸಿದೆ
----------------
- ಅ.ರಾ.ತೇಜಸ್

ಒಂದಷ್ಟು ಕವನಗಳು..

೧

ನನ್ನವಳ ಹಣೆಬೊಟ್ಟು

ನನ್ನೆದೆಗೆ ಕಾಲಿಟ್ಟು

ಕಾಡುತಿದೆ ಕನಸುಗಳ;

ಬದಿಗಿಟ್ಟ ಬಿಚ್ಚೋಲೆ

ಬೀರುತಿದೆ ಮಂದಹಾಸ

ಕಸಿದು ನನ್ನೆದೆಯ ಮನಸ..

೨

ಮಿಂಚೊಂದು ಹೊಮ್ಮಿತು

ಕಾರ್ಮೋಡದ ಅಂಚಿನಿಂದ,

ನನ್ನಯ ಸಹನೆಯ ಮಧ್ಯದಿ -

ಸೀಳಿ ಹೋಯಿತು ಅರೆಕ್ಷಣ..

ಸಹನೆಯ ಹೊತ್ತು ಕಾದಿದ್ದೆ

ನನ್ನ ನಲ್ಲೆಯ ಕಾಣಲು,

                ನಲ್ಲೆಯು ಕಾಣಲಿಲ್ಲ - ಸಹನೆಯು ಸಾಯಲಿಲ್ಲ

ಮುರಿದ ಸಹನೆಯ ಹೊತ್ತು

ಕಾದಿರುವೆ ಅದೇ ಮಿಂಚಿಗೆ

ನನ್ನವಳ ಕಾಣುವ ಆ ಹೊತ್ತಿಗೆ..

೩

ಹೊಗೆಯಂತೆ ಕೆಣಕೆಬ್ಬಿಸಿದೆ

ಈ ಮೋಹವ;

ಸುಳಿಯಂತೆ ಸೆಳೆದೆ 

ನನ್ನೋಳಗಿನ ಪ್ರೇಮವ;

ನಿನ್ನ ಕಣ್ಣಂಚಿನಲಿ ಯಾವುದದು -

ಸೆಲೆಯು?

ಅವಿತಿದ್ದ ಕನಸಿಗೆ ಹಾಕಿತದು -

ಬಲೆಯು..

ರೆಪ್ಪೆ ಬಡಿತದಲ್ಲೂ ನಿನ್ನ ಹೆಸರಿನ ಕೂಗು,

ಎದೆಯಿಟ್ಟು ಕೇಳುತ್ತ ಮನವ ನೀಗು..

೪

ಖಾಲಿ ಹಾಳೆಯ ಪದ್ಯದಲ್ಲಿ
ನನ್ನವಳ ಹೆಸರಿಹುದು, ಕಂಡಿರಾ?
ಮನದಲ್ಲಿ ತುಂಬಿ
ನೆನಪಲ್ಲಿ ತುಳುಕಿ
ಹಗಲಿರುಳು ಕಾಡುವಳು ನಲ್ಲೆ
ದಾಟಿಸಿ ಪ್ರೇಮೋಲ್ಲಾಸದ ಎಲ್ಲೆ..

 ೫

ನಿರೀಕ್ಷೆ..

ಹಸಿದ ಹೊಟ್ಟೆಯ ಮೇಲೆ
ರೊಟ್ಟಿ ತಟ್ಟಿದನಾತ
ಆ ಹಸಿವೆಯ ಕಾವಲ್ಲೆ
ಬೇಯಿಸಿದನು ರೊಟ್ಟಿಯ..
ತಿಂದು ತೇಗಿದ ಮೇಲೆ
ಉಳಿದಿದನು ಬಿಸಾಡಿದ,
ಕತ್ತಲಿಗೆ ಸೇರಿತು
ಆ ಹಸಿದ ಹೊಟ್ಟೆಯು
ರೊಟ್ಟಿಯ ನಿರೀಕ್ಷೆಯಲ್ಲೆ..

-ಅ.ರಾ.ತೇಜಸ್